लिङदेनको दावी - सबै दल असफल, अब राप्रपाले मात्र निकास दिन सक्छ

काठमाडौँ : राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले देशलाई राप्रपाले मात्रै निकास दिने दावी गरेका छन्।  नेपाल सनातन धर्म संस्कृति संगठनको काठमाडौँ जिल्ला अधिवेशनलाई सम्बोधन गर्दै उनले यस्तो दाबी गरेका हुन्।

देशका अन्य राजनीतिक दलहरू असफल भइसकेको उनको भनाइ छ। उनले देशको राजनीतिमा अनिश्चय र अनिश्चितताको कालो बादल मडारिरहेको बताउँदै यस्तो समयमा राप्रपाले निकास दिने बताएका हुन्।

उनले परम्परागत कार्यशैलीबाट पार्टीलाई बलियो बनाउन नसकिने भन्दै नेतृत्वदेखि कार्यकर्तासम्म सबै बदलिनुपर्नेमा जोड दिए। उनले पार्टीको आगामी महाधिवेशनमार्फत पार्टीलाई पुनर्जीवन दिने गरी पुनर्गठन गर्नुपर्ने बताए। त्यसका लागि महाधिवेशनको तयारीमा जुट्न उनले नेता कार्यकर्तालाई आग्रह गरे।

उनले पार्टी संगठन विस्तार नगरी राप्रपा ठूलो बन्न नसक्ने भन्दै सबैका लागि ढोका खुला गर्नुपर्ने बताए। उनले राजसंस्था र हिन्दुराष्ट्र पुनःस्थापनाको पार्टीको एजेण्डा स्थापित गर्न संगठन विस्तार र प्रभावकारी राजनीतिक गतिविधि आवश्यक रहेको बताए।

लिङदेनले भने, ‘सबै राजनीतिक दल असफलताको बाटोतर्फ गइराखेका छन्। यस्तो वेला देशलाई निकास र दृष्टि दिने पार्टी राष्ट्रिय प्रजातन्त्र पार्टी हो। त्यसैले हामी नयाँ ढङ्गले जानुपर्छ।’ आसन्न महाधिवेशनलाई पार्टी पुनर्गठनको अवसरको उपमा उपयोग गर्नुपर्नेमा उनको जोड छ।